ريتا صالح النداف 

منذ قرابة أسبوع، أصدر القضاء اللبناني أمس، مذكرات توقيف وجاهية بحق 4 ضباط، في إطار التحقيقات الجارية في انفجار مرفأ بيروت، بينهم الرائد في أمن الدولة جوزيف الندّاف، الذي كان أوّل الكاشفين عن وجود نيترات الأمونيوم في مرفأ بيروت، وأوّل المحذّرين من خطورة هذه المواد، متخذا كل الاجراءات القانونية المتاحة له ضمن اطار مسؤولياته وصلاحياته في هذا المجال. 

وعن قضيّة توقيف الرائد الندّاف، كتبت الزميلة ريتا صالح النداف هذه الكلمات ننقلها لكم باللغة العامية كما وردت الينا:  

"سيدي وأبي حين نصاب بالألم، كنا نلتفت وننظر اليك، فان كان ألما لا يصل اليك، اذن ليس ألما، ويموت في نفوسنا. حين ننعم بالفرح كنا نلتفت اليك، فان كان فرحا لا يصل اليك، فهو اذن ليس فرحا، ويموت في نفوسنا". 

"يوم استشهادك كان يوم موت الألم والفرح في نفوسنا، ولصغر سننا بتنا مكسوري الجناحين..."    

بهيدي العبارات وصف الرائد المغوار جوزف ميلاد النداف استشهاد بيو العقيد المغوار الشهيد ميلاد النداف عام 2000، على يد مجموعة ارهابية نصبوله كمين في الضنية. 

اليوم، ومن بعد 20 سنة على استشهاد العقيد النداف، يمكن انو نوصف الواقع بالمرير والأليم... لما يكون البي استشهد كرمال لبنان وكرمال يحمي لبنان بدمو، يكون الابن عم ينظلم على يد الطبقة الفاسدة يلي حاول الرائد النداف انو يكشف فسادها...  

بالمختصر، حب العقيد الشهيد للوطن ووفائه للمؤسسة العسكرية ما ممنعت ابنو البكر يستسلم... دافعت عائلة النداف عن المؤسسة العسكرية طيلة 20 سنة محبتا بالوطن ووفاءا لدم "ميلاد". 

ورغم استشهاد البي، دخل جوزف النداف الى المؤسسة العسكرية، وكفى مسيرة العقيد بكل وفاء... وصار "مغوار" بطل. 

الرائد المغوار جوزف ميلاد النداف منو "ضابط عادي". جوزف ابن "بيو". 

خدم بالدولة اللبنانية بكل شغف ونشاط ووفاء وتضحية، تكللت مسيرته بالنجاح وحب الناس والعسكر لألو.. "وما في حدا بيعرف جوزف الا ما بحبو... " 

اليوم، جوزف صار رائد في المديرية العامة لأمن الدولة.  

رائد خدمته كانت انو يحارب الفساد على مرفأ بيروت، يحارب كل مين بيتخطى القانون. مهمته كانت على المرفأ يوقف بوجه كل عملية فساد وسرقة بتحصل داخل المرفأ ضمن الصلاحيات المحددة لأمن الدولة. الرائد كشف الكتير من قضايا الفساد، كشف اخطر عمليات السرقة، وعمليات التزوير، وهدر المال العام، بسنة واحدة. 

الحقيقة باختصار، قبل 4 آب بشهور، جوزف راسل، كشف، بلغ عن المواد الخطرة الموجودة داخل عنبر الموت بمرفأ بيروت. جوزف رجع راسل وبلغ وتوجه بكتاب للمعنيين عن خطورة المواد الموجودة بالعنبر رقم 12... جوزف حاول ضمن صلاحياته يحمي لبنان واللبنانيين ويحمي العاصمة بيروت من انفجار كبير... وعمل شغلو واكتر من شغلو وما استسلم... 

كل انسان شريف بيعرف انو الرائد النداف مظلوم.. مظلوم لان هلأ بدل ما يكون هوي حر طليق والمعنيين لاهملوا مراسلات جوزف بالسجن، صار العكس... العكس يعني: "الرائد موقوف بتهمة انو عمل شغلو والمعنيين الفاسدين احرار لان ما عملوا شي... " 

جوزف منو بريء، لان هوي منو مذنب... جوزف كان ورح بضل بطل بعيون كل شخص نضيف... هوي بطل اولا بعيون الشهيد ميلاد، هوي بطل بعيون ميلاد الصغير وليا الصغيرة، هوي بطل بعيون مرتو وامو واخواتو وكل العالم... جوزف رح يرجع أقوى، راسو مرفوع للأعلى... ما حدا في يغبر على مسيرة جوزف العسكرية..  

تعودنا بهدي الدولة انو الفساد أقوى من كل شي.. بس اليوم رح نقول ان الحق والعدالة والحقيقة رح تكون أقوى من كل فاسد بالدولة. 

4 اب كشف اهمال الدولة والسلطة السياسية من سنة 2013. الا انو بالمقابل كشف نظافة كف جوزف وشغلو واندفاعه للعمل براحة ضمير...   

للمعلومات، الرائد النداف بس استلم مهمته داخل مرفأ بيروت لمكافحة الفساد تم اطلاق نار على بيتو. لي؟ لان كشف الكتير... 

المغوار البطل ابن الشهيد البطل كمّل بمسيرة بيو، وكل العالم فخورة فيه. 

الحق يقال: "العدالة للرائد جوزف النداف"، هيدا الضابط الوفي والأدمي. 

ختاما،  كان محتمل انو عائلة النداف اليوم تكون عم تعيش نفس تجربة 2000 لو كان جوزف داخل مكتبه على المرفأ. وكان من المحتمل انو يكون مصيره متل مصير بيو... بس عدالة ربنا حميت جوزف وعدالة السما عم تصليلو تيرجع مرفوع الراس عجبينو عنوان الكرامة.. 

"العدالة للرائد جوزف ميلاد النداف... والحقيقة معروفة..."  ما في ظلم بدوم!!!".