داليا داغر 

عزّت عليي الدني…
منّي مع الحرب…
منّي مع الخطوات غير المدروسة والأخطاء الاستراتجية والاستفراد بالقرارات…
بس ولا مرة إلّا ما كانوا أعداء لبنان بالمرصاد…
ومش وقت حلل بالسياسة…
بس عزّت عليي الدني وصغرت كتير وهيي أصلًا عم تصغر كل ما عم نكبر وكل ما عم نقطع بهيك مصايب… بتحس حالك عم تصفي علاقاتك وعم تنظف نفسك وعم توضح خياراتك وعم تنضج اكتر ...
وكمان مش وقت إتفلسف وحلل وأوعظ ولو نفسي…
بس عزّت عليي الدني بس شفت كنيسة دير ميما بدير ميماس وشو عم بيتصور منها…
وكيف عم يُستهزأ بطقوس ديانتنا…
وكيف في ناس عم يتداولوا الفيديو وكتار منهم بشماتة ومسخرة…
هيدي حرب ايه وبالحرب خصوصًا بوقتنا حرب اعلامية ونفسية واستفزازية...
بس عزت عليي الدني وسألت مختارة دير ميماس تأكدت انه الفيديو مظبوط وجاوبتني ايه هيدي الكنيسة اللي عالنهر…
وبالضيعة فيه عشرين شخص بيناتن في مرا حامل وما عم بخلوهم يطلعوا من بيوتهم علقوا هونيك…
وهني فاتوا ع الضيعة وموجودين بطرقاتها ومانعين الناس تطلع من بيتها وعم يجربوا يحكوا تيطلعوهم وما عم يقبلوا يخلوهم يفلوا…
ما بعرف شو بينقال اكتر من انه اذا نحنا من وطن واحد؟! خففوا وجع الناس، هيك فيديو عم تتناقلوا من قلب كنيسة عم يتمسخروا فيها ما بيشبه ولا مسيحي بفوت ع كنيسة انه يشمت وما بيشبه ولا اي شخص بيدعي انه مؤمن من اي دين كان انه يتمسخر…
والله العظيم هالبلد بيستاهل نكون عم نرحم بعضنا أكتر…
والله يخلصنا ونصير كلنا نآمن بضرورة وجود دولة وجيش قوي مرتكزة ع وحدة ابناء بلدنا، بقرار موحد لصالح وطننا، تما يشوفوا ويعيشوا ولادنا وأحفادنا بعد عشرة وعشرين سنة اللي عم نشوفوا…ونعيشوا…