دعت الإعلامية، داليا داغر، إلى الاستمرار بالتبرّع لـ"​تيليتون سطوح بيروت​" الذي تقيمه عبر شاشة الـ"OTV" في زمن الأعياد لتغطية نفقات علاج 12 حالة إنسانية.

وأشارت داغر في مقدّمة برنامجها "ضروري نحكي" عبر شاشة الـ"OTV" إلى "أنّنا تمكّنا في 23 كانون الأول من تأمين نحو 300 ألف دولار والباقي هو 200 ألف دولار بعد 9 ساعات من تلقي المساعدات على الهواء". 

وقالت: "مش قليل أبداً يلي صار بـ23 كانون، كنّا خايفين إنو نكون عم نخاطر اكتر من اللزوم، كنا خايفين من الازمة وخايفين عالناس يلي معتمدين علينا لنوصّل معاناتن ووجعن وحاجتن للمساعدة. كنّا خايفين إنو الحاجة الكبيرة ما تلاقي ملاذ أو حضن أو كتف تلقي عليه".

وأضافت: "بس يلي صار ما كان قليل أبداً! قدرنا نجمع أكتر شوي من 300 ألف دولار. والباقي 200 ألف رح نقدر الليلة بإتكالنا كمان مرّة عليكن إنو نجمعن ليكتمل المبلغ وتتكامل مشاعر الفرح بعطاء كان كبير وعلى قدر التوقعات".

وتابعت: "صحّ الأزمة كبيرة، بس اللبناني صعب كتير إنو ينهزم. اللبناني يلي بوطنو أو ببلاد الانتشار. هنّي قلب واحد بيتفاعل بالفرح وبالوجع. يمكن نكون فقدنا مقوّمات الدولة، يمكن صرنا بعداد الدول الفاشلة، بس الأكيد أنو ما ممكن نفقد مقوّماتنا الإنسانية والأخلاقية، لأنّو بوقتا منكون خسرنا كلّ شي!".

وأضافت: "الليلة ما رح نخسر. الليلة مكمّلين مع أصحاب القلوب والأيادي البيضا، مكمّلين مع ضيوفنا بالاستديو الأب هاني طوق والشيخ محمد حمود، لنرجع نذّكر بالحالات يلي احتضنا التيليتون هيدي السنة، ولنقدر نكفّي السباق حتّى خطّ النهاية السعيدة مش بس للحالات يلي بحاجة ولكن لإلنا كلنا، لأنّو جزاء العطاء بوقت الازمة بيتضاعف بالسما وكمان عالأرض".

وختمت: "الليلة قبل 4 أيام من نهاية العام. 27 كانون رح يكون امتداد لـ23 لنعبر للعام 2022 مسلّحين بالحبّ وما شي إلا الحبّ".